Tingulli i shiut të butë mund të jetë relaksues, por gjithashtu mund të na bëjë të ndihemi letargjikë. Vjeshta dhe shiu e bëjnë largimin nga ngrohtësia e shtratit një sfidë të vërtetë. Por pse ditët me shi ndikojnë kaq shumë në energjinë dhe disponimin tonë? Psikologia Rachael Molitor nga Universiteti i Coventryt nw Angli shpjegon pse është e vështirë të ngrihesh kur bie shi dhe si t’i lehtësosh mëngjeset me shi.
Sipas saj, ditët me shi i bëjnë shumë njerëz të ndjehen letargjik. “Për disa, shiu përforcon dëshirën për të qëndruar në ambiente të mbyllura dhe për të ngadalësuar ditën, ndërsa për të tjerët mund të shkaktojë një ndjenjë aventure”, shpjegon Molitor.
Reagimet tona ndaj shiut varen nga përvojat e kaluara dhe nga mënyra se si ne e perceptojmë shiun. “Nëse po planifikojmë ta kalojmë ditën brenda, shiu mund të mos ketë aq shumë ndikim. Por nëse kemi planifikuar aktivitete në natyrë ose një udhëtim të gjatë, shiu mund të shkaktojë zhgënjim”.
Qielli gri dhe retë e errëta – si ndikojnë ato në trupin tonë?
Shiu shpesh vjen me qiell gri dhe më pak dritë dielli, gjë që ndikon në orën tonë të brendshme. “Ritmet tona cirkadiane varen nga rrezet e diellit – kur ka më pak dritë, truri sinjalizon se është natë, gjë që mund të zvogëlojë vigjilencën tonë”, shpjegon Molitor. Ndriçimi i dobët mund të ngadalësojë trupin tonë, të reduktojë motivimin dhe të vështirësojë daljen nga shtrati.
Gjithashtu, i ftohti shton ndjenjën e rehatisë nën një batanije të ngrohtë, gjë që e bën edhe më të vështirë ngritjen nga shtrati. “Rënia e temperaturës mund të rrisë dëshirën për të kursyer energji, duke e bërë më të vështirë ngritjen në mëngjes dhe fillimin e ditës”, shton Molitor, raporton Index.hr, transmeton Klankosova.tv.
Pse zhurma e shiut na vë në gjumë?
Tingulli i shiut ka një efekt qetësues dhe mund të na bëjë të përgjumur. “Tingujt e butë të shiut janë qetësues dhe nxisin relaksimin”, thotë. Molitor. “Gjatë ditëve me shi zvogëlohet prodhimi i kortizolit, hormoni që na mban zgjuar, ndërsa melatonina, hormoni që nxit gjumin, rritet”.
Kombinimi i këtyre faktorëve shpesh çon në ndjenjën e lodhjes dhe letargjisë, duke i bërë mëngjeset me shi një sfidë të veçantë.
Si ta bëni më të lehtë ngritjen në ditët me shi? Mundohuni të kaloni sa më shumë kohë të jetë e mundur nën dritën natyrale dhe siguroni një rutinë të ngrohtë për një fillim më të lehtë të ditës.